Rydym yn plannu 22 o goedwigoedd ysgol fel rhan o uchelgais Coedwig Genedlaethol Cymru.

Mae 400 o goed cynhenid yn cael eu plannu ar safle pob Eco-Ysgol, gan greu coedwrych, perthlys neu goetir bach ym mhob awdurdod lleol.  Er nad yw wedi bod yn bosibl cynnwys disgyblion yn y gwaith plannu, pan fydd y cyfyngiadau yn caniatáu, bydd ganddynt gyfle i dorchi llewys a gofalu ar ôl y coed wrth iddynt dyfu a ffynnu.

Mae’r prosiect yn cael ei ariannu gan Lywodraeth Cymru fel rhan o Goedwig Genedlaethol Cymru.

Dywedodd Lesley Griffiths, Gweinidog yr Amgylchedd, Ynni a Materion Gwledig:

Rwy’n falch iawn ein bod wedi gallu cynorthwyo Cadwch Gymru’n Daclus gyda’u gwaith plannu mewn prosiectau Eco-Sgolion ar draws Cymru, trwy ein cynlluniau ar gyfer y Goedwig Genedlaethol. Wrth i ni geisio gwneud Cymru yn genedl wyrddach a thecach, gan barhau â’n nod o fod yn genedl carbon sero-net erbyn 2050, mae’n hanfodol bod plant yn cael y cyfle i ddysgu am bwysigrwydd coed a choetir, a’u heffaith fuddiol hollbwysig ar ein hamgylchedd. Er bod y cyfyngiadau oherwydd pandemig Covid-19 wedi golygu nad yw disgyblion wedi gallu cymryd rhan yn y gwaith plannu, rwy’n siŵr y byddant yn manteisio ar bob cyfle i ofalu ar ôl eu coetir newydd, a hoffwn ddiolch i Cadwch Gymru’n Daclus am eu gwaith yn plannu’r coed a’r coedwrych hyn.

Mae pecyn i athrawon wedi cael ei greu fel rhan o’r prosiect, yn llawn gweithgareddau ar gyfer yr ystafell ddosbarth ac ar gyfer dysgu gartref, wedi eu dylunio i helpu pobl ifanc i ddeall gwerth coed.  Mae’r adnoddau ar gael i bob ysgol yn rhad ac am ddim ar wefan Cadwch Gymru’n Daclus.

Pecyn gweithgareddau athrawon 

Dywedodd Lesley Jones, Prif Weithredwr Cadwch Gymru’n Daclus:

Rydym yn falch o gefnogi datblygiad Coedwig Genedlaethol Cymru gyda’r prosiect Eco-Sgolion cyffrous hwn. Rydym eisiau sicrhau bod pobl ifanc yn cydnabod pa mor wych yw coed a pha mor hanfodol ydynt i’n hamgylchedd. Trwy gynnwys myfyrwyr wrth ofalu am y coedwigoedd newydd hyn a darparu adnoddau yn rhad ac am ddim i bob ysgol, ein gobaith yw creu cenhedlaeth o ‘warcheidwaid coed’ sydd wedi ymrwymo i ofalu am goed a mannau gwyrdd a’u diogelu.

Mae’r 22 o goedwigoedd newydd wedi eu lleoli yn / gerllaw yr ysgolion canlynol:

• Ysgol Gymuned Bryngwran, Ynys Môn
• Ysgol Gynradd Sofrydd, Blaenau Gwent
• Coleg Cymunedol Y Dderwen / Ysgol Gynradd Brynmenyn, Pen-y-bont ar Ogwr
• Ysgol Lewis i Ferched, Caerffili
• Ysgol Uwchradd Gatholig Mair Ddihalog, Caerdydd
• Ysgol Gyfyn Emlyn, Sir Gaerfyrddin
• Ysgol Bro Pedr, Ceredigion
• Ysgol Swn Y Don, Conwy
• Ysgol Gatholig Crist y Gair, Sir Ddinbych
• Ysgol Maes y Felin, Sir y Fflint
• Ysgol Glan Y Mor, Gwynedd
• Ysgol Gynradd Gymunedol Coed-y-dderwen, Merthyr Tudful
• Ysgol Gynradd Rogiet, Sir Fynwy
• Ysgol Bae Baglan, Castell-nedd Port Talbot
• Ysgol Gyfun Gwent Is Coed, Casnewydd
• Ysgol Bro Gwaun, Sir Benfro
• Ysgol Calon Cymru, Powys
• Ysgol Gynradd Meisgyn, Rhondda Cynon Taf
• Ysgol Bishop Vaughn, Abertawe
• Ysgol Gynradd Pontnewydd, Torfaen
• Ysgol Gynradd Colcot, Bro Morgannwg
• Ysgol Rhosnesni, Wrecsam

New school forests creating a generation of ‘tree guardians’